話說隔咗幾個月我先睇到史兄點咗我名去解一吓咩叫「借錢梗要還、咪俾錢中介」。而成件事既源頭其實係來自呢篇文章。咁我又講吓呢兩句嘢背後既小故事。
借定唔借？還得到先好借！
要講「借錢梗要還」，又點可以唔講佢個好朋友「借定唔借，還得到先好借」呢。
相信兩者大家作為香港人都聽唔少，分別喺邊呢？好簡單，財仔就講「忠告：借錢梗要還、咪畀錢中介」，銀行就講「提示：借定唔借？還得到先好借！」，呢個好多人都知，個問題係點解要有Differential treatment呢？明白咗個Differential treatment就會明白咩叫「借錢梗要還」喇。
要知道呢兩句嘢嘅背後最大嘅推手乃係金管局，金管局最擔心乜嘢呢？就係金融機構既穩定，所以佢無提你「月息年息要小心、實際利率最均真」，反而提你「還得到先好借」，唔好連累銀行，同埋既然你個底咁爛要衰到銀行唔問而要走去問財仔借，麻煩「借錢梗要還」唔好諗住走數，搞到畀人淋紅油、門鎖痴膠水，仲要連累香港呆壞賬上升呀！
比較吓兩句，明顯銀行句「提示：借定唔借，還得到先好借」比較似同大人講嘢，反觀「忠告：借錢梗要還」就好似係同小朋友講咁，無嘅，百貨養百客啫。
【延伸閱讀】【收息】拆息連跌 除了港元定存仲有咩揀？
咪畀錢中介，即係點？
大家需要明白，借財仔嘅人的確係一班經濟能力比較弱、信貸記錄比較花嘅一班人，呢個唔係歧視，而係事實，你走入去兄弟財務借嚿錢APR30%以內嘅我讚你叻。你睇吓銀行，貴極咪15%，以下係渣打嘅息口表，最貴都係6厘有找，Tax Season仲平，咁你做乜要去借財仔？
大家需要明白，借錢嘅人都係等錢洗既。正正因為借錢嘅人都係等錢洗嘅，而當佢哋借唔到嘅時候，自然就會有人向佢哋招手，呢啲就係所謂嘅「財務中介」。
首先要講明一點，財務中介並唔犯法，但從2016年12月1日起，放債人條例規定放債人需要為確保中介公司無向借款人收取任何費用，先至可以做呢單生意。故曰：咪畀錢中介。
咁正當嘅中介嘅經營模式係點嘅呢？佢哋玩嘅係「規模經濟」，有啲似團購，一班人就應該平啲，我手握住好多客想做Mortgage，你就要畀比街息平嘅息我，同時再向銀行要求服務費，達致個客成功攞到低息貸款、銀行做到生意、中介又搵到錢嘅三贏局面。
咁唔正當既中介又點玩法呢？其中一種玩法係中介同時亦係財仔，一人分飾兩角，由於法例並唔容許貸款超過60厘，一超就會被視為高利貸要封舖拉人了，為咗合法繞過，就做中介收取客戶高昂申請費、手續費、託管費等，就算貸款只有40厘，我明明借你100萬，但收你50萬手續費，那利息就是80厘了。最衰係放債人條例又唔管中介公司，咁就政府都吹佢唔脹了。
【延伸閱讀】【結餘轉戶】清卡數必學！話你知咩係結餘轉戶貸款
借錢梗要還、咪畀錢中介兩句嘢嘅關係
其實兩者係「無關係」。
睇番英文：Warning： You have to repay your loans. Don’t pay any intermediaries.
你又可以expect呢兩句嘢有咩關係？
【文章來源：華田銀行；已獲授權轉載。原題：銀行閑談 （45） — 咩叫借錢梗要還、咪俾錢中介？】
【關於作者】
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。
兒時夢想做i-banker，結果做了bank worker，還要是retail那種。過去在各大小銀行不同部門流徙，叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發，到現在還未安定下來。不懂財經、不懂經濟，只想談一下「銀行」這回事。
撰文 : Wallace Tin
欄名 : 華田銀行
https://wealth.hket.com/article/2407992/%E3%80%8C%E5%80%9F%E9%8C%A2%E6%A2%97%E8%A6%81%E9%82%84%E3%80%8D%E5%90%8C%E3%80%8C%E9%82%84%E5%BE%97%E5%88%B0%E5%85%88%E5%A5%BD%E5%80%9F%E3%80%8D%E6%9C%89%E5%92%A9%E5%88%86%E5%88%A5%EF%BC%9F
