一個踢拖落大埔街市買餸嘅男人，被檔販誤會係廢青，但其實佢係傑青！佢叫黎偉業，有七間上市公司。 是咁的，最近有個新開拍飲食節目叫《The CEO’s Kichen董事廚房》， 男主持廣邀商界同娛樂圈名人擔任嘉賓， 喺佢幢豪宅任食任玩，有錢又有面， 所以呢位主持-黎偉業吸引咗小編注意。
香港比華利山獅子會你可能未聽過，但係你一定知比華利山別墅係豪宅， 黎偉業就係比華利獅子會創會會長， 佢擁有三幢比華利山別墅， 一家四口住緊嗰間係7000呎，連天台地庫樓高七層， 連係雪櫃都有6個。 而裝修緊嗰幢別墅，有兩萬呎。問你怕未？ 點先可以有三幢比華利山別墅？ 黎偉業有140間公司，其中七間係上市公司， 業務由旅遊、飲食、電競、創科到醫療等等都有， 範圍非常之廣。
咁點先可以名下有140間公司？ 翻查黎偉業過去接受過嘅訪問唔算多， 但都有提及過創業故事。 佢強調自己非富二代， 讀中學時會做part time、買賣二手書搵外快。
黎偉業話，佢發達係因為20幾年前， 同朋友夾份租工廈改裝為迷你寫字樓， 免費畀大學生成立一人公司創業， 呢班大學生經常為自己創作嘅產品搞活動去推廣， 黎偉業就到處聯絡廣告商搵贊助，賺取中間嘅廣告費， 從而搵到第一桶金， 一賺就係幾百萬。 20幾前年已經諗到呢個方法賺錢， 又真係抵佢成功。
講返吸引到小編注意嘅飲食節目， 呢位有140間公司嘅CEO， 原來日日都會落大埔街市買餸，佢好平易近人冇架子， 仲會踢住拖街坊look咁落， 畀檔主誤會佢係無業遊民同廢青！ 但其實佢唔係廢青，係傑青。 2016年，黎偉業獲頒全球華人傑青代表。 難得黎偉業好大方，冇嬲個檔主， 仲會講笑咁講返出嚟。 呢位長髮CEO，好多人話佢係富二代， 但佢就強調係自己白手興家， 到底係唔係呢？ 小編又再翻查資料，聽日再睇！ 圖片來源：都市日報、都市盛世、Stars HK 及網上資料圖片
